چینی کار ساز کمپنی چیری کا تھائی لینڈ میں مینوفیکچرنگ پلانٹ قائم

بینکاک۔: چینی کار ساز کمپنی چیری اور اس کی ذیلی کمپنی اوموڈا اینڈ جائیکو نے تھائی لینڈ میں اپنی نئی توانائی گاڑیوں (NEV) کے پیداواری پلانٹ کا باضابطہ افتتاح کر دیا جو ان کے عالمی مینوفیکچرنگ نیٹ ورک کے پھیلاؤ میں ایک اہم سنگ میل ہے۔

مشرقی صوبہ رایونگ میں واقع اس پلانٹ میں جدید مینوفیکچرنگ صلاحیتیں موجود ہیں، جن میں ایلومینیم باڈی ویلڈنگ اور مکمل بیٹری پروڈکشن لائنز شامل ہیں جبکہ 2030 تک سالانہ 80,000 یونٹس کی پیداواری صلاحیت کا ہدف مقرر کیا گیا ہے۔

افتتاحی تقریب کے دوران چیری انٹرنیشنل کے ایگزیکٹو نائب صدر چن چون چھنگ نے کہا کہ نیا پلانٹ کمپنی کی مقامی سطح پر سرگرمیوں کو فروغ دینے کی کوششوں کو ظاہر کرتا ہے اور تھائی لینڈ کو علاقائی نیو انرجی وہیکلز کے مرکز کے طور پر پیش کرتا ہے۔

انہوں نے زور دیا کہ چیری تھائی مارکیٹ میں اپنی جدید ترین گاڑیاں متعارف کراتی رہے گی اور تیزی سے جدید ٹیکنالوجیز، بشمول آٹو پائلٹ، ویلیٹ پارکنگ سسٹمز اور اے آئی انٹرایکٹو ٹیکنالوجیز کو متعارف کروائے گی۔

تھائی وزیر سوپاماس اسارابھکدی نے اس بات پر زور دیا کہ یہ سرمایہ کاری تھائی حکومت کے اس ہدف سے ہم آہنگ ہے کہ 2030 تک زیرو ایمیشن گاڑیاں کل آٹو موبائل پیداوار کا 30 فیصد بن جائیں۔انہوں نے کہا کہ عالمی توانائی غیر یقینی صورتحال کے پیش نظر متبادل توانائی کے حصول کو تیز کرنا ایک اہم طویل مدتی حل ہے اور غیر ملکی سرمایہ کاری جدید ٹیکنالوجی کی منتقلی، تھائی افرادی قوت کی مہارتوں میں اضافہ اور مقامی روزگار کے مواقع پیدا کرے گی۔

طویل مدتی صنعتی ترقی کو یقینی بنانے کے لیے اوموڈا اینڈ جائیکو تھائی لینڈ نے تقریب کے دوران چونبوری اور رایونگ کے ٹیکنیکل کالجز کے ساتھ مفاہمتی یادداشت پر بھی دستخط کیے۔

اس منصوبے کے آغاز کے ساتھ چیری تھائی لینڈ میں مقامی پیداوار شروع کرنے والی بڑی چینی نیو انرجی وہیکلز کمپنیوں میں شامل ہو گئی ہے جن میں بی وائی ڈی، چانگان، جی اے سی ایون، جی ڈبلیو ایم اور ایس اے آئی سی کی ایم جی شامل ہیں۔